- परमानंद वर्मा गॉव आज उदास ,हतास ,अशांत ,परेशान और दुःखी हैं अपने नालायक बेटो की नालायकी को देख कर ! वह कुछ भी कहना नही चाहता और दिल दिमाग भी खराब करना नही चाहता !चौथेपन में वह असहाय और बेसहारा हो चला हैं जबकि ऐसे समय में सहारे की जरूत होती है। जिन बेटों को पढ़ाया लिखाया ,उसके अपने पैरों पर खड़ा किया!आज वे ऊँचे ओहदों पर हैं। कोई डॉक्टर ,इंजीनियर ,वकील ,जज ,नेता ,अभिनेता ,साहित्य कार ,ब्यवसाई ,और नामी गिरामी उद्योगपति हो गया है। इन बेटो की उपलाधियों को देख कर वह फुले नही समाता |बड़ी आशा थी गांव से निकले बेटों से ,गाँव की विकास में उनकी सहभागिता होंगी, लेकिन उनकी बेरुखी को देख कर वे मौन है ।क्या उम्मीद और आशाएं थी ,नाज था बेटों पर लेकिन उस पर पानी फिर गया ।गाँव एक बार जाना हुआ ,उसके हालत को देखा तब पूछ बैठा -क्या हो गया आपको ? बड़े बेरुखी औऱ तमतमाये भावो से कहा -बेटा ,यह ना पूछो तो अच्छा है, पर अपने मन की पीड़ा और दुख को उगल दिया। इसी संदर्भ में प्रस्तुत हैं यह छत्तीसगढ़ ई आलेख - दया मया ले जा रे मोर गाँव के।

बहुत पहिली के बात हे एक दिन आकशवाणी ले ए गीत ह परसारित होवत रिहिस है तेन ला रेडियो मं सुन परेंव। ओ गीत के बोल अइसन हे- कांटा-खुंटी के बिनइया जंगल झाड़ी के रेंगइया दया,मया ले जा रे मोर गांव .., के ... दया , माया ले जा रे मोर गांव के... ये गीत ल हर कोनो रस्ता चलत, नइते बाजार हाट मं, नाचा-गम्मत मं जरूर सुने होही, सुनत होही। अउ कभू सुने ले मिलय चाहे झन मिलय फेर बुधवार के दिन वो गीत संगीत के शौकिनहा मन बारह-साढ़े बारह बजे अपन-अपन कान ल रेडियो कोती टेड़के जरूर रखथे। मनपसंद गीत तो विही दिन सुने ले मिलथे। ओ दिन महूं इही गीत ल सुन परेंव। जान दे का बतावौ संगी हो, ओ गीत हर मोर रोम-रोम मं पोह गे।

गांव के माटी, कांटा-खूंटी अउ जंगल-झाड़ी के बीच रहिके बढ़ेन, पढ़ेन, लिखेन, जवान होयेन। ओकर बाद इहां आगेन, गांव ल छोड़के शहर आगेन, मोला सुरता हे जउन दिन गांव ला छोड़ेव ओ दिन ओहर चार आंसू बहाय रहिसे, फेर मैं गरकट्टा, दोगला अउ नमक हराम, ओ आंसू के कदरे नइ करेंव अउ अइसे अंधरा बनके आगेंव जइसे कुछू जानौ नहीं।

अब पच्चीस- पचास बच्छर जब गुजरगे तब गांव कोती निहार के देखथौं तब गांव हाड़ा परगे राहय। मांस-लोथड़ा के नाम नहीं। मैं बहुत जाने के कोशिश करेंव के आखिर गांव के अइसन हाल कइसे होगे, कोन करिस ओला बेहाल? कोनो जवाब देबर तइयार नइ होइस। मन मं शंका होथे- कोनो ओकर मनके मुंह मं ताला तो नइ ठेंस दे हे? मन मं बहुत दुख होथे अउ नाना परकार के सवाल उठथे- कोन लेगे गांव के हंसी-खुशी, जउन कभू सावन-भादो मं खेत मं लहलहावत फसल असन चारों मुड़ा घुमड़त राहय, कोन लेगे दूध, दही अउ लेवना ला, जेला खा-पी के गांव के लइका-सियान गोल्लर असन मेछरावत राहय अउ कोन लूट लिन जेवर, जायदाद, बरतन भाड़ा ला जेकर से छोटे-बड़े सबके घर आबाद राहय?

मैं हारे जुआरी असन जोर से फफके रो परथौं। गांव सचमुच सुखा के हाड़ा होगे हे तभो ले मोर करा आगे ओहर कहिथे- रो झन बेटा। जउन होना रहिसे तउन होगे। जेकर किसमत मं जउन लेखा रथे, ओला विधाता घला नइ टार सकय कहिथे। हमर भाग मं अइसने दिन देखे बर बदे रहिसे, भुगते के बदे रहिसे। देख लेन अउ भुगत लेन घला। अब तो हमर उपर जाय के दिन आगे, बस भगवान तुंहर मन के जिनगारी ल खुश राखय, अतके हमर आशीष हे। गांव मोला बहुत बोधाय के कोशिश करिसे, फेर मोर मन ओकर से शांत नइ होइस। मोर हिरदय मं तो गुस्सा के मारे आगी के जुवाला धधकत रिहिसे। मोर गांव के अतेक दुरदशा करके रख दिन, लुटपाट के सत्यानाश कर दिन। कोन अइसन मनखे हे जेकर अतेक हिम्मत होगे मोर गांंव मं डाका डारे के? जब तक में एकर पता नइ लगा लुहूं ओकर से बदला नइ ले लुहूं तब तक मोर आत्मा ल शांति नइ मिलय?

अतेक गुस्सा नइ करय बेटा। गांव मोला समझावत कहिथे- जउन काम शांति से, थीर लगा के करे जाथे ओ काम सफल होथे। अउ जब समय विपरीत रहिथे, तब तो बहुत सोच-विचार के, पांव फूंक-फूंक के चले ले परथे। का मालूम कब दुश्मन कइसे अउ कोन रूप मं वार कर दै। गुस्सा ला छोड़ अउ मन मं धीरज रख, सब काम ऊपर वाला ठीक कर दिही। चल खाय-पीये के बेरा होगे हे जादा मंझन झन कर?

खा-पी के खटिया मं परगेन तभो मोला चैन नहीं। एती अलथी-कलथी अउ कभू ओती, मोर नींद परबे नई करै। गांव बराबर मोर परेशानी ल देखत रिहिसे, ओहर पूछथे, कइसे तोला नींद नइ आवत हे बाबू? मैं जान डरेंव तैं आज बहुत परेशान हस। फेर अब तोर परेशान होय ले का होही जउन होना हे तउन तो होगे। आगी लगे मं कुंआ खोदे ले का फायदा?

ओहर पूछथे- तैं मोर बेहाली के हाल जानना चाहथस ना तब सुन, बने कान खोल के सुन। देख रिस झन करबे? मोर जतका पढ़े-लिखे बेटा हौ तौने मोला मेट के रख देव, मोर इहां जीना हराम कर देव। मैं सोचे रहेंव पढ़-लिख के तुमन चेतलगहा होहू, बने खाहू कमाहू अउ सब ला सुख देहू फेर तुमन सब सुवारथी निकलेव, मतलबिहा निकलेव। सब गरकट्टा, बेईमान अउ दोगला होगेव। तुंहर ले तो बने ये नइ पढ़े-लिखे हे तउन बेटा मन बने हे। जेला तुमन अड़हा अउ अंगूठा छाप कइके हांसी उड़ाथौ फेर जउन दिल, दया, ममता, पियार अउ सेवा येकर मन मं भरे हे तउन तुंहर मन मं एक पाई के बरोबर नइहे। मोला आज गरब अउ गुमान हे इही अड़हा अउ अंगूठा छाप बेटा मन ऊपर, जउन अपन धरती मइया के सेवा करत तुंहरो मन के धियान रखे हे।

गांव हर कहिथे- तुमन ला मैं लिकायेंव-पढ़ायेंव, आज तुमन जतका डॉक्टर, इंजीनियर, वकील, नेता, अभिनेता, साहित्यकार बने बइठे हौ। सब अपन गांव ल भुला गेव। कोनो अइसे बेटा हे जउन अपन घर, गांव, अउ महतारी बाप ला भुला जाही फेर आज मैं अपन छाती मं पथरा रखके काहथौं के ओ निर्दयी अउ मतलबिहा बेटा तुमन हौ। गांव आज बीमार परे हे, फेर विही गांव के बेटा शहर मं जांक गांव ला भुलागेव अउ बीमार गांव के इलाज करे खातिर आय बर कतरावत हौ। नहर नाली, सड़क, बांधा बनाना हे फेर इंजीनियर ल गांव फूटे आंखी नइ सुहावय। गांव अदालत पेशी अउ थाना मं फंसे हे फेर वकील बेटा अपने बाप-महतारी के आंखी मं धुर्रा झोंकत पइसा बटोरत हे, समस्या के जंजाल मं उलझे हे गांव, फेर नेता ला दिल्ली, भोपाल, रायपुर ले फुरसत नइहे। अभिनेता अउ साहित्यकार मन तो रंगरेलिहा होगे हे। ओमन कला अउ साहित्य ले कम जीयत जागत मूर्ति मं जादा रचना करे के मौका देखथे। बस जिहां देखौ तिहां आज येमन रंगरेली मनावत फिरथे।

मैं कान खोलके गांव के एक-एक बात ल सुनत रहेंव। ओहर अउ आगू कहिथे- आज जउन ऑफिस मं जाव बिगर पइसा के कांही काम नइ होवय। बाबू ले ले के बड़े साहब, नेता सब तरी कोती ले बटुआ छाप नोट लेवत हे तब काम करथे। अरे तुमन तो सब पढ़े लिखे हौ का, हमन देहाती गांव के मनखे हन, अउ हां तहूं मन तो गांवेच्च के आव रे फेर गांव के हीरा-पीरा ल कइसे भुलागेव, कइसे गांव मं फसल उपजथे अउ कइसे मं ओकर हाथ मं चार पइसा आथे तेला तुमन जानथौ फिर कइसे जानसुन के तुमन गांव ल हलाल करथौ? ये नेता मन गांव बर करोड़ो-अरबों के हर साल योजना बनाथे फेर गांव आज जिहें के तिहां हे, सिरिफ विकास उखरे मन के होवत हे।

तैं पूछत रहे न बाबू! कोन करे हे गांव के बेहाल? अब तोर मन मं जउन आगी लगे रहिसे तउन होगे न शांत? तुंहरे करनी में आज हाड़ा होगेंव बेटा। दोष में अब तहूं मन ल नइ दो, ये तो मोर करमभोग रहिसे तउन ल भोगे हौं मैं अउ मोर महतारी कांटा-खुंटी के बिन-बिन के जंगल-झाड़ी ल पार कर-करके मजूरी करे ले जाय। तभो ले कइसनो करके तुमन ल पढ़ा-लिखा के होशियार बना देन। फेर धन रे हमर फूटे भाग, हमरे सोना खोट निकलगे। अब येमा सोनार ला दोष देवन के जेवर बने नइ बनाय, तब तो हमरे गलती हे। का होगे बाबू! जाव जिहां राहव हमर बुढ़वा मन के दया-मया निसदिन तुंहर संग बने राहय। गांव के अतके बात सुन के मैं कठवा होगेंव। आखिर का जुवाप देतेंव ओला? मैं मुड़ गडिय़ाय गतउतार असन गांव के बात सुनते रहेंव... सुनते रहेंव...।