- परमानन्द वर्मा लगन होय, मन मं काम करे के, दृढ़ संकल्प अउ इच्छा शक्ति के, तब का नइ हो सकत हे? अइसन शूरवीर मनखे मन ला तो देख के पथरा घला कांप जथे, टुकड़ा-टुकड़ा हो जथे, धरती जिहां कभू एक दाना नइ होय तउनो हा अनाज उपजारे ले धर लेथें, सुक्खा परे कुआं, तरिया अउ नरवा सब मं पानी ओगरे ले धर लेथे, धार बोहाय ले धर लेथे। अउ जउन मनखे अलाल, कामचोर, गरियार असन होथे तेला तो अपन शरीर ला चलाना गरु (भारी) हो जथे, जिनगी पहाड़ हो जथे. अइसन बहुत कम मनखे होथे जउन शून्य ले काम शुरू करथें, लोगन ओला देख के हांसथे, मजाक उड़ाथे, ओकर के एहा का कमाही, बेवकूफ हा, मूरख हा। फेर ओकर लगन, मेहनत ओला ओ मुकाम मं पहुंचा देथे के जउन कभू ओला देख के हांसत रहिथे, तउन मन दांत निपोर देथे अउ कहिथे- के अइसन कइसे होगे? जिनगी का हे, एक खेल-तमाशा बरोबर तो हे, जुआ हे। चकरी चलगे तब तो वाह-वाह हे, अउ कहूं धपोर दीस, गरियार बइला असन धूरा ला पटक दीस तब तो होगे बंठाधार। न एती के रेहे, न ओती के। खेल दू समोसा करा ले शुरू होथे। पास मं फूटी कउड़ी नहीं, छदाम नहीं। उधार-बाढ़ी करके धंधा शुरू करिस, चाय अउ समोसा कभू सोचे नइ रिहिस होही के एकर परसादे ओहर लखपति हो जही, बन जही। पइती माढग़े। गाड़ी चलना शुरू होइस अउ अइसे चलिस के पल्ला बइला गाड़ी कस दउड़े लगिस। टपरी असन दुकान ला बड़े जनिक दुकान बना डरिस, देखते-देखत पांच एकड़ जमीन खरीद डरिस, बेटा-बेटी मन के बिहाव कर डरिस। देखइया मन के आंखी पटपटागे, जइसन कभू सोचे नइ रिहिन हे तइसन होगे। शहर ले समोसा के पदारपन, गांव मन मं कबले हो हे, पूछबे तब कोनो बने ढंग ले नइ बतावय? आलू गुंडा अउ भजिया पहिली गांव के जहां-तहां होटल में बनत रिहिन हे। जलेबी, बालूसाही, रसगुल्ला अउ गुलाब जामुन ला घला कोनो नइ जानत रिहिन हे फेर जबले शहरी हवा एती उतरे ले धरिसे तउन पइत ले ओ सबो जिनिस बतरकिरी बरोबर गांव मन मं झपागे। शौकिन हा नाश्ता करइया मन तो अब सबो जिनिस गांव मं खाये ले धर ले हे। शहर ले कोनो कम नइ रहिगे हे गांव हा। फेर ये तीर जउन समोसा बनइया हे तउन कहां ले देख के सीख के आय रिहिसे, के ओकर समोसा के दुकान चल निकलिस। एको झन के हाथ मं लछमी लिखाय रहिथे, अइसन कहिथे, तउन बात सही हे तइसे लागथे। बाप जुआड़ी रिहिसे ओकर, एक-दू एकड़ जमीन रिहिसे तेन ला जुआ मं फूंक डरिस। खाय-बर तना-तना होय ले धर लिस। नानपन मं लइका घर के जिम्मेदारी संभालिस, दाई संग दीस। भाठापारा मं नजूल के जमीन मं टपरी बनाके धंधा सुरू करिस। भगवान संग दीस। ककरो करा हाथ नइ लमाइस, भीख नइ मांगिस। आज मोटर साइकिल दबाके, फर्राटा मारत उड़त हे पंछी बरोबर बेटा सुखराम। कोनो-कोनो ओला पूछथे- अतेक अकन कइसे कमा डरे बेटा- तब सुखराम कहिथे- ये सब समोसा के माया हे गा, न दारू पीयेंव, न जुआ खेलेंव अउ न कोनो लटर-पटर मं फंसेंव। सोझ रस्दा मं रेंगेव, मोला ये मंजिल मिलगे।